Itoobiya oo xidhay mid ka mid ah Mucaaridka ugu weyn dalkaas

0

Itoobiya-(Berberanews)-Laamaha ammaanka ee dalka Itoobiya ayaa xidhay hogaamiye mucaarad oo caan ah.

Merera Gudina oo ah hogaamiyaha Oromo Federalist Conference ayaa magaalada Brussels u tegay si uu khudbad ugu jeediyo baarlamaanka Yurub isaga oo ka warbixinaya xaaladihii u dambeeyay ee dalka oo ay ka mid tahay lixda bilood ee xaaladda dagdaga ah ee dalkaasi lagu soo rogay bishii October.

Dawladda Itoobiya ayaa sheegtay in ay xidhxidhay in kabadan kaw iyo toban kun oo ruux tan iyo intii uu bilawday xukunka dagdaga ah.

Bare sare Merera Gudina ayaa si dagdag ah loo xidhay Arbacdii, ka dib markii uu ka soo laabtay magaalada Brussels.

Warbaahinta deegaanku waxaa kale oo ay sheegeen in la xidhxidhay qaar ka mid ah qaraabadiisa oo iyagana la socday.

Xukuumaddu ma aysan shaacinin sababta ay u xidhay, laakiin horay ayuu si wayn dawladda ugu dhaliilay xidhitaanka boqolaalka ruux ee Oromada iyo Amxaarada ah, wuxuuna sheegay in xukunka dagdaga ah aanu daboolin mudaaharaadyadii dawladda lagu diidanaa ee soo socday wakhtiga sanadka ku dhaw.

Kulanka Midawga Yurub waxa uu soo jiitay xubno sarsare oo ka tirsan mucaaradka kuwaas oo ay ka mid yihiin kuwa la mamnuucay ee qurbo joogta ah.

Waxaa sidoo kale ka soo qayb galay Feyisa Lilesa oo ah oradyahankii indhaha caalamka ku soo jeediyay mudaaharaadyadii Itoobiya ee bilaha socday.

Bare sare Merera ayaa horay xabsi ugu soo jiray todobo sano ka dib markii uu ka soo horjeedsaday xukuumaddii kali taliska ahayd ee Mengistu Haile Mariam.

Sidoo kale wuxuu ka soo qaybqaatay afgambigii boqor Xayle Silaase loo gaystay taas oo ahayd boqortooyadii ugu dambaysay ee ay Itoobiya soo marta.