Golaha Wakiillada oo ansixiyay mooshin lagu dallacsiiyay degmooyin

0

Hargeysa (Berberanews) Mudaneyaasha Golaha Wakiillada Somaliland, ayaa ansixiyey mooshinka darajo dalacsiinta Dagmooyinka Caynabo, Taleex iyo Baligubadleh.

Degmooyinkan, ayaa laga dhigay derejada B, iyaga oo markii hore ahaa C.

63 mudane ayaa golaha fadhiyay, 36 waxa ay u coddeeyeen in loo codeeyo, 22 mudane waxa ay u codeeyeen in laga doodo, lix mudanena waa ay ka aamuseen, guddoomiyuhuna muu coddayn, sidaasi ayaanu ku ansaxay.
Mudaneyaasha Muxaafidka ah ee Golaha Wakiillada, ayaa ku guul dareystay inuu meel mar noqdo mooshin ay horkeen Golaha Wakiillada, kaas oo xambaarsanaa nuxur la mid ah mid kale oo ay wateen Xildhibaannada Mucaaradka ee Golahaasi.
Labadan Mooshin oo ujeeddadoodu ahayd derejo beddelka Degmooyinka dalka qaarkood, ayaa waxa jabay oo kii ay Muxaafidku wayeen oo sharci yaqaannada Goluhu sheegeen in aanu waafaqsanayn sharciga, madaama oo uu ka hadlayey mabaa’id guud oo aanay ku xusin Mooshin qodob gaar ah oo wax laga beddelayo oo la xidhiidhay xeerka 23 ee ismaamulka degmooyinka iyo gobollada.
Mooshinkan jabay ee Xildhibaannada Muxaafidku wateen, ayay ku doonayeen in wax lagaga beddelo degmooyin 20 gadhaya, kuwaas oo qaarkood yihiin derajada D.

Mooshinka la ansixiyey ee Xildhibaannada Mucaaradka wateen, ayaa waxa ay si gaar ah ugu dalbanayeen saddex degmo ee C ahaa in loo dalacsiiyo ‘B’, kuwaas oo kala ahaa Caynaba, Balligudbadle iyo Taleex.