Madaxweyne ku-Xigeenka Somaliland oo xadhiga ka Jaray Laamaha Dahabshiil Bank International iyo Damal Hotel ee Berbera.

0

Berbera(Berberanews):-Madaxweyne Ku-xigeenka Somaliland Cabdiraxmaan Cabdillaahi Ismaaciil (Saylici), ayaa Xadhigga ka jaray Xarumo Ganacsi oo isugu jira Laan uu yeelanayo Baanka Dahabshiil International iyo Huteel Casri ah oo ay Shirkadaha Dahabshiil Group ka hirgelisay Magaalo-xeebeedda Berbera ee xarunta gobollka Saaxil.

Madaxweyne ku xigeenka Cabdiraxmaan Cabdilaahi Ismaaciil (Saylici) oo munaasibadaasi ka hadlay ayaa yidhi “waxa runtii dhammaanteen farxad inoo ah inaynu ka soo qayb galno, daahfurka hotelkan cusub ee Damal Berbera oo ay maalgalisay shirkada Dahabshiil Group oo aan u baahnayn sharax badan, Ummadda reer Somaliland meel kasta oo ay joogto iyo maalta Afrika oo dhan laga aqoonsan yahay, waynu u hambalyeynayaa, xaaajiga iyo kooxda la shaqaysa, horumarka balaadhan ee ay dalka ku soo kordhinayaa, oo ah mid loo baahan yahay, dalkani waa dal maanat curdin ah, mudo dhawr iyo labaatan sanadood ah ayeynu soo yabyabnay, meelw anaagsan ayeynu soo gaadhiisnay nidaam iyo kal dambayn ayeynu dhisanay, waxana aynu u baahan inay mar wlaba halkaa ka sii qaadno, mar walba Xukuumadaydadu waxay dhiirgalinaysaa soo jiidashada maalgashiga shisheeyaha.”

Wasiirka Wasaaradda Madaxtooyada Mudane Maxamuud Xaashi Cabdi ayaa isaguna halkaasi ka hadlay waxaanu yidhi “Waannu bogaadinaynaa shirkada Dahabshiil group horumarka balaadhan ee ay samaysay, guud ahaan dalka iyo dunidaba, si gaar ah kan aynu maanta Hotelkan weyn ee magaallo madaxda gobolka Saaxil ku soo kordhay ee Berbera ee aynu joogno, aad iyo aad ayaannu u bogaadinayaa, hoteelkan magaallada Berbera waa looga baahnaa kuwo kale oo badana waa loogga baahan doonaa, waayo halkani waa marsadii qarankan, waa meeshay aynu doonayno inaynu dunida oo dhan iyo wadamada qaarada Afrika in badan oo ka mid wax u marino, inaynu qurxino iyo inaynu weel u tolno, in meel dunidu ku soo degto, meel laga ganacsado si ay u noqoto.”

Wasiirka Madaxtooyada ayaa sidoo kalena hambalyeyey shirkada Dahabshiil waxaanu yidhi “ Runtii hoteelkan aynu maanta furayno ee Xaaji Maxamed Saciid iyo shirkada Dahabshiil waxay astaan u tahay Berbera iyo koritaankeeda, inaynu dhinaca wanaagsan u socono ayey tusaale u tahay, waxa ay tusaale u tahay dhulka Berbera ee kacaya iyo dayrarka kacaya, waxay markhaati ka yihiin siyaasadii aannu qaadanay ee Madaxweynaha Jamhuuriyadda Somaliland nagu hoggaaminayey, ee madaxweyne ku xigenku nagu hoggaaminayey, ee ahayd siyaasad hano-qaaday, ganacsiga gaarka loo leedahay ee dalkani wuu dano qaaday ee ay shirkada Dahabshiil kow ka tahay.

Shirkadaha ganacsiga ee gaarka loo leeyahay wax badan ayey dalka ka qabteen, waxa sababay nabadda Somaliland ka hano qaaday, Dawladnimada, bisaylka Ummadeena, waxa shababay siyaasada Xukuumaddihii kala dambeeyey ay ku dhiirigaliyeen.”

“Horumar faro badan ayaannu gobolkan ka wadnaa, Dekedii ayaannu ku wareejinay shirkad dhista, bulshada Saaxil way nala shaqaysay, dareenkaasna way soo dhawaysay, dood adag baa nagu dhex martay dagaal qadhaadh ayaa nagu dhex maray arrintaa dad badan oo siyaasiyiin ah, annaguna waxaannu wadnay geediga horumarka iyo maalgashiga in aannu ummadda u soo jiidno, dad kalena waxay wadeen inay nashuushadeeyaan waxaa wanaagsan ee aannu wadnay, bulshada Saaxil waxay taageereen ray’igii caafimaadka qabay ee horumarka horseedka u ahaa, waa Cashiimo qaad, waa bisayl cashiimada ka soo horjeeda, halan hodheelo hore oo waa weyn ayaa laga dhisay, oo Cabdiqaadir Xaashi Cilmi uu Maansoor hoteelka barxada ugu weyn ee magaallada haysta, taasina cashiimo qaad ayey muujinaysaa.”

Wasiir Xaashi ayaa sidoo kalena baaq u diray ganacsada dalka waxaannu yidhi “ Ganacsatada dalka waxaannu ku dhiirgalinaynaa oo ugu baaqaynaa inay ganacsiga sii kordhiyaan oo wax qurux badan oo casri ah oo dunida u dhigna, oo dad badan ayaa inoo iman doonee aynnu weel u samaysano, inay meel walba wax ka dhisaan oo dalkooda aaminaan ayaanu ku dhiirigalinaynaa, waxaannu leenahay waar lacagta badan ee malaayiinka doolar aynu galino dhulka, oo hoteeladan oo kale ah iyo Cisbitaalada aynu dibada ugu baxno aynu halkan ka dhisano.” Sidaa ayaa lagu yidhi Warkaas Qoraalka ah ee Madaxtooyada naga soo gaadhay.

Geesta kale, Mulkiilaha Dahabshiil Group Maxamed Siciid (Dahab-shiil), ayaa halkaas ka hadlay, kana warramay Dhismahan iyo Ganacsiga Casriga ah ee ay Shirkaddu ka hirgelisay magaalada Berbera. Maxamed Siciid waxa uu sheegay in Dahabshiil Group keliya aanay Somaliland ku ballaadhinaynin Ganacsigeeda, hase-yeeshee, ay Dhulka Soomaalida, Waddamada Afrika iyo inta badan dalalka Caalamka ku ballaadhinayso Laameheeda Ganacsi ee kala duwan.

Munaasibaddan waxaa ka soo qaybgalay madaxda Heer Gobol iyo Degmo ee Gobolka Saaxil, Wasiirrada Arrimaha Gudaha Jsl Yaasiin Xaaji Maxamuud Faratoon,  Wasiirka Kaluumaysiga, Wasiirka Xanaanada Xoolaha Mr Cukuse, Wasiirka Ganacsiga, Wasiirka Caafimaadka Mr xaglo Toosiye, Wasiirka Dalxiiska,Wasiirka Ciyaaraha, Taliyaha Ciidamada Badda, Taliyaha Ciidanka Dab-Damiska Somaliland, Cuqaal, Xildhibaanno iyo ganacsato.