Madaxweynihii iyo Raysal-wasaarihii la haystay ee Mali oo iscasilay

0

Mali-(Berberanews)-Madaxweynihii ku meel gaashka ahaa ee dalka Mali, Bah Ndaw, iyo Ra’iisul Wasaarihiisii, Moctar Ouane, ayaa si rasmi ah isu casilay, sida ay tabisay Wakaaladda Wararka ee AFP.

Mr Ndaw iyo Mr Ouane ayaa xidhnaa tan iyo galinkii dambe ee maalintii Isniinta, waxaana lagu hayay xero ay militariga ku leeyihiin duleedka magaalada caasimadda ah ee Bamako.

Askarigii hoggaaminayay afgambigii sanadkii lasoo dhaafay ka dhacay dalkaas, kaddibna noqday madaxweyne ku xigeenka dowladda ku meel gaarka ah, Col Assimi Goïta, ayaa labadoodaba ku eedeeyay inay gudan waayeen waajibaadkooda ku aaddan sidii dalka looga samata bixin lahaa xilliga kala guurka.

Wararka ku saabsan is casilaaddooda ayaa soo baxay xilli dhexdhexaadiyeyaasha ku howlan xiisadda waddankaas ku yaalla Galbeedka Afrika ay booqasho ku gaadheen iyagoo rajo ka qabay in laga sii daayo gacanta militariga.