Saax-dheer Ha Weerarin: Maanso Ka Digaysa In Lagu Duulo Taleex iyo Buuhoodle

0

Waxa ay baroordiiq iyo tacsi u tahay guuldarrada maalin walba ka dhacaysa deegaanka Sool iyo Buuhoodle. Maxay u dhimanayaan wiilashaydu? Labada dhinacba waa jidhkaygii. Waan u damqanayaa..

 

Tixdan magaceeda waxa la yidhaahdaa

Saax-dheer ha weerarin!

Taariikhda Curinta iyo tebinta 17kii Mey, 2014ka!

Hal-abuur Siciid Maxamuud Gahayr

Guddoomiyaha Akadamiga Waxbarashada iyo Cilmi-baadhista ERA

Xubin Ka Tirsan Naadiga Hal-abuurka iyo Qalinleyda SOMALI PEN

saedmgahair@hotmail,com

 

Ugu horreyn waxa aan ka xumahay warka sheegaya in weerar lagu qaaday deegaanka Saaxdheer, iyada oo loo dabbaal-degayo maalintii qarannimada Somaliland ee 18ka Mey. Ma in maalin loo kaadiyo ayaa la garan waayay? Mise waxa la doonayaa in damallada Sool, Sanaag iyo Cayn la nacsiiyo ciidanka Qaranka iyo nidaamka ay udub-dhexaadka, damalka iyo laf-dhabarta u yihiin? Ma ciidan ayaa lagu hantiyi Buuhoodle iyo Talex mise caqli iyo wada-hadal?

 

Waa maanso baaq iyo bayaan ah oo ku socota adeerradayda aan jecelehay ee reer Somaliland Md Cali Khaliif Galaydh, Garaad Jaamac Garaad Cali iyo Garaad Saleebaan Maxamed. Waa hal-door muwaaddiniin ah oo uu tebayo qaranka Somaliland, mar ay noqotana waxa aan filayaa in ay Hargeysa iman doonaan.

 

Waa bayaan nabadeed iyo soo-dhaweyn… Meerisyadeedi waa kuwan

 

 

Sadbuursamadii aad

Lixdankii ka siigteen

SOOL qaadan maysoo

Sacab aanad kaba mudan

SELEL kuuma tumaysoo

SANAAG-barina leeleel

Sandullayn ma yeeshoo

BUUHOODLE waa surin

Suugaaggu didiyee

Adoon CAYN u samafalin

Widhwidh saamigii qaaday

Sabo BOOCAMAA iyo

Meygaale solan yahay

Suuxshay reer KALSHAALII

Saldhig yahay HAGOOGANE

SAAXDHEER HA WEERARIN!

 

Seeto aan TALEEX mudan

Nin yaqaan safaad iyo

Sinniqsuu ka maagaa

Suuraafiddii shalay

Siqid baa labaysee

Care suul-dhabaalada

Saaxiib kumaa yidhi

“Siko oo ka soo joog

Saanaddaada dib u guro

Ha sumaynnin beel nabad

Talo saafiddeeddii

Sallaxyada u fuushee

Surinkaa ka soo noqo

Ha saloolan meeshii

Sayid Maxamed waa hore

Safka reer DARAAWIISH

Halgan ugu sinnaayeen

Ku sargoynayeen guluf!

 

Saldhiggii xoreyntiyo

Taariikhda sama-wade

Dumin maayo soodhkuye

Siilaanyo guutada

Sakaraad adoon badin

Dib u seexi wiil nool”

SAAXDHEER HA WEERARIN!

 

 

Garaad waa Saleebaan

Walaw looga sacab tumay

Xamartii silloonayd

Waa hanad so’daydiyo

Saamigayga koowaad

Uma quudho saymee

Waa guurti saaxiya

SAAXDHEER HA WEERARIN!

 

Garaad Jaamac waa saad

Sida soorta loo tebo

Sadrigaygu jecelaa

Samaa oo habboonaa

Summad weeye sharafeed

SAAXDHEER HA WEERARIN!

 

Waxan saarray jiiftaa

Sacabbada u tumayaa

Suuraynayaa milay

Saluug daawo loo helo

Ma saloolanaayee

Jeeroo Saleebaan

Kursigiisa siiyuu

Cirro saaxad taabtoo

KOORE loo sallaxo meel

Samaaluu hantida dhigo

FUAAD uu sadkii helo

Fagadhaa siraadee

Biixi uu sarkaal yahay

Cali yahay sarreeyaa

Sugi kara amniga keli

Xirsi laga sannaadh yahay

Sunuud dooni maysee

Deeqi ii sax weeyaan

SAAXDHEER HA WEERARIN!

 

Siciidow adaa geya

Nin siddeetan badiyee

Sannifkaaga qiil iyo

Sabab looma heli karo

Yuusuf saro maxkamaddaa

Sulaaqeeda uu wado

Fadal siidhi ii tumo

Shaqalluhu sirdoon yahay

C.I.D tol aan nahay

Sabab jeelka Xiirane

“La yidhaa adaa suga”

Suuree Ismaaciil

Cadde uu u xidhay soodh

SAAXDHEER HA WEERARIN!

 

 

Samihii Galaydhow

Cali Ciise sirinsirin

Mabda’ uga santaagow

Saddexdaad abuurteen

Subax raace Gaas oo

KARAASH suudalkii aad

Surinnada Garoowoo

INDHASHEEL saqiiryoo

BIINDHAA sunuud iyo

Sarrif quutay dhagaree

Samataliye Boorama

Ku sugnaa markaan idhi

Shanta saara duubkow

Ra’iiskii Suldaannimo

Cabdiqani u soocow

 

Sebigeenna Eebbuhu

Sool uu ku beeriyo

Saraar wiilasheedii

Sallaxley dirkeedii

Seylac doobabkeedii

Saaxil wiilasheedani

Sidig weeye aan hurin

Salaan iyo bariidee

 

Dhaaxaydun saaxiib

Siilaanyo wada jira

Sir wasiirka tebiyiyo

Siyaadkii ahaydeen

Niman suur afuufee

 

Isa-seegga maantuna

Suus yaanu noqonnine

Kala-saafitankani

Waa saabley dhimatiyo

Sarid dhiig ku daatee

Samad iyo Ilaah baan

Ku dhaarshay siinkee

Saqda toose maan garan

Sahankuu u jeedee

 

Adaa PHD sare

Sahay qaatay maantee

Salli waxa aan ku dhigi

Seeraha dhulkeennee

Cabdiweli ha suuxee

Seetee qabiiloo

Qaran sees hormoodow

 

Saddex iyo sagaalkii

JAWHAR way ku sugaysaa

Siddeed iyo tobnaad MEEY

Sawraceedu waa adi!

Haddeer SAMATAR waa madi

Safka goorta uu helo

Adigiyo sagaal kale

Siduu Daahir buu madax

Saac beerayaa khayr

Sallaan fuulayaa madax

QASRI suus ka tirayaa

 

Saleebaan ha naaxoo

Hawl guud sidalagtiyo

Sareenseer ha raystoo

Sandullena ha oriyee

Cadamina sifaa magac

Ha sameeyo taariikh

Dhul sanaag midaysoo

Biyo-siibitinkiyo

Markab wiilkay saareen

Shafka sawd ha dhaafshee

Saalax iigu sheeg nabad

Saado iiga gee khayr

Cabdow waan saldhigaynnaa

Saadaal-rumowday

Siinley iigu tahay kow

Waa saamax baaquye

Safxadaha kitaabkiyo

Ila dheehda suurado

 

SAMATALIYE KHAATUMO

Salka joojay hagistow

Haddii ay sinnaantiyo

UCID saydho waanada

WADDANINA sibaaq yahay

Hab sabbaaxaydan wada

KULMIYE-na sas uu qabo

Saddexda inaan rido

Intaan suunka qaataan

UDUB iyo XAQ-SOORTII

Sidkayaa darkii shalay

La sansaaro liicshee

Guddi sadar ku reebtoo

UDUBSOOR ma curinnaa?

 

SAMATALIYE KHAATUMO

Dhaaxuu Faysal siibtee

Xisbigii hannaan sugay

Haddii ay saluugaan

Surma-seegto dumiyaan

Dimuqraaddi soorii

Safka beretan kow-laba

Ku sal-guurshay beernimo

Haddii aan sareediyo

Lagu aamminayn sabo

Jamaal waa sitiinkii

Da’-na waa sokeeyaha

Sahan guusha curiyee

MADAXWEYNE loo sudhin

Sannad iyo bil dabadeed

Allaylehe nin suuraa

Kordhin saadinaayee

Somaliland-nimo

Su’aal baa ka joogtoo

Daljir suulin maynnee

UDUBSOOR ma curinnaa?

 

SAMATALIYE KHAATUMO

Sayloonku ii dadan

Sirna waan qarsanayaa

Ah saxaafaddiinnaa

Runta saynle sheegtee

Waa inoo samaan-dhalad

Wacad aan saxeexiyo

Kaga siimiyaan qarin

Sintiinnaan istaagnahay

Nin safaad-wado garo

In Samiic ku daawado

In Sarreeye marag yahay

Subxaan aanu dhimanayn

Qiyaamena sakalo yahay

Suurti ay dhawaan tahay

 

Siyaasow dhankaad tahay

Xasuuq waa sahaalee

Seefta qaata naartoo

Ha u tumin safxaduhuu

Nebi Maxamed saydhee

Khasraj iyo salkii Aws

Safarkii xabaalaha

Tiro-kooba ha saaqina!

 

Ninka saarka tumayee

Sheeknimada suuskaa

Jihaad aan sal iyo hoos

Taxriim sawraceed helin

Saddexdaba ku marayow

MAALIK iyo silsilladii

SUKHRUF maad halmaanteen? 

 

 

 

 

Abwaan Saeed Mohamoud Gahair