Somaliland oo dacwad ka gudbisay Idaacadda VOA

0

Hargeysa(Berberanews)- Xukuumadda Jamhuuriyadda Somaliland ayaa waraaq dacwad ah ka gudbisay laanta AfSoomaaliga ee Idaacadda VOA ,sida ay baahisay Wakaalada Wararka Somaliland ee SOLNA .

Waraaqdan dacwada ah oo ka soo baxday 18 kii bishan March xafiiska wasiirka wasaaradda Warfaafinta Jamhuuriyada Somaliland Md. Cabdiraxmaan Cabdillaahi Faarax (Guri-Barwaaqo) waxa lagu socodsiiyay ku simaha Agaasimaha Qaybta Africa ee VOA  Scott Stearns, iyo Madaxa laanta Af Soomaaliga  Cabdiraxmaan Yabarow. Waxa xukuumaddu ay sheegtay in idaacada VOA ay wado  dhex dhexaad la’aan iyo dheelitir la’aan ay kaga xagliso   Jamhuuriyadda Somaliland.

Warqaddan ayaa lagu sheegay in badhtamihii sannadkii 2017kii   Jamhuuriyadda Somaliland u dirtay VOA cabashooyin in ka badan  saddex jeer, kuwaasi oo aan  waxba  laga  beddelin habkii ay idaacadaasi  wax uga baahinaysay Somaliland.

Siday werisay Wakaaladda SOLNA, waxa Warqadda lagu xusay Barnaamijkii doodda ahaa ee  15 March 2018, ka baxay ka laanta Af Soomaaliga VOA ee ku saabsanaa heshiiskii Dekedda Berbera ee ay wada galeen DP World, Somaliland iyo Ethiopia.

Taas oo ay ka muuqatay in loo xaglinayo dadkii ka soo horjeeday heshiiskaasi ee dhinaca  Somalia. Xukuumaddu waxay ku eedeyaysay in doodaas  ay idaacadu  soo wada qaadatay dadkii  heshiiska ka soo horjeeda oo kaliya balse aanay jirin cid taageersan heshiiska oo la sii daayay. Ugu dambayn waxa xukuumaddu sheegtay inay waajib tahay in dib u eegis lagu sameeyo heshiiskii xukuumadda Somaliland iyo VOA-da.