Waa kuma Madaxweynaha cusub ee Puntland?

0

Garoowe(Berberanews)-Waxaa lagu dhawaaqay natiijada doorashada madaxweynaha maamulka Puntland.

Labada musharrax ee ku tartameysay wareegga saddexaad ayaa kala helay sidan,Siciid Cabdullaahi Dani oo helay 35 cod. Asad Cismaan Cabdullaahi oo helay 31 cod.

Waxaana lagu dhawaaqay in Siciid Cabdullaahi Dani uu yahay madaxweynaha cusub ee maamulka Puntland.

Waxaa xilka madaxweynaha si rasmi ah loogu dhaariyay Siciid Cabdullaahi Dani oo noqonaya madaxweynaha cusub ee maamulka Puntland.

Barlamaanka maamul goboleedka Puntland ayaa madaxweynaha maamulkaasi u doortay Saciid Cabdullaahi Dani oo ku dhashay magaalada Muqdisho sanandkii 1966-dii. Madaxweyne Siciid Dani ayaa waxbarashada dugsiga dhexe iyo kan sare ku qaatay isla magaalada Muqdisho.

Wuxuu sidoo kale ka baxay jaamacadda ummadda Soomaaliyeed, gaar ahaan kuliyaddii luuqadaha. Wuxuu sidoo kale takhasuuskiisa kusoo qaatay dalka Malaysia, kahor inta uusan ku biirin siyaasadda.

Saciid Dani ayaa Soomaaliya ka soo qabtay xilal kala duwan oo ay kamid tahay wasiirka qorsheynta ee dowladdii Xassan sheikh iyo xildhibaan dowladda federaalka sannadkii 2012-kii, waxaana siyaasad ahaan la sheegaa in uu aad ugu dhawaa dowladdii Xassan Sheekh Maxamuud.

Saciid Dani oo aan Soomaaliya ka bixin ayaa waxaa uu deegaanada Puntland ka hirgeliyay shirkado ganacasi, waxaana siyaasadda uu kusoo biiray sannadkii 2002.

Saciid Cabdullaahi Dani oo kamid ahaa musharixiintii u tartamayay xilka madaxweynaha ee Soomaaliya sannadkii 2016-kii ayaa isaga iyo qoyskiisa waxay Soomaaliya ka qaxeen xiliyadii dagaalada sokeeye.

Loolanka doorashada

Saciid Cabdullahi Deni waxaa uu tartan culus geliyay madaxweyne Cabdiweli Cali Gaas, oo isagu hormuud ka ahaa khilaafka maamul goboleedyada iyo dowladda federaalka Soomaaliya.

Waxaana laga warsugayaa sida uu noqon doono xidhiidhkaasi maalmaha soo socda,

Doorashada Saciid Cabdullahi Deni waxay mugdi gelineysaa mustaqbalka siyaasadeed ee madaxda maamul-goboleedyada ee ku soo hadhay iskaashiga maamul-goboleedyada.

Source: BBC Somali